Sunday, January 10, 2016

የሕዳሴው ገደል እምን ላይ ደረሰ? . . . በእውቀቱ ስዩም


የሕዳሴው ገደል እምን ላይ ደረሰ?


አውሮፕላን መጣ እየገሰገሰ በዘፈን አንደኛ ሙሉቀን መለሰ (እስከመቸ ድረስ ጥላሁን ገሰሰ) የሕዳሴው ገደል እምን ላይ ደረሰ? የሕዳሴውን ግድብ ወደ ‹‹ሕዳሴው ገደል›› ያሸጋገረውን ስምምነት የፈረመው ሰውየ ‹‹እጁን ለቁርጥማት፤ ደረቱን ለውጋት›› እንዲዳርገው በመመረቅ ወደ ሰላምታየ እገባለሁ። እንዴት ናችሁ፤ ያልታደላችሁ? እኔ በሕይወቴ በተለያየ ጊዜ ተስፋ ቆርጫለሁ። እንደ ዘንድሮ ተስፋን፤ ከሻኛውና ከፍሪምባው አፈራርቄ የቆረጥሁበት ጊዜ አልገጠመኝም። መንግሥትም ሃያ ዓመት ሙሉ አጥሮ፤ ሃያ ዓመት ሙሉ ቆፍሮ የተሳካለት አይመስልም። ‹‹በየቦታው እንምሳለን። ለመጭው ትውልድ ነዳጅ ሳይሆን ጉዱጓድ እናወርሳለን›› የሚል ነው የሚመስለው። የዛሬ ዐሥራ አምስት ዓመት ገደማ ውኃ ማቆር የተባለ ፕሮጀክት ነድፎ ነበር። እናም ኅብረተሰቡ
በየጓሮው ሮቶ ሮቶ የሚያክል ጉድጓድ እየቆፈረ የዝናብ ውኃ እንዲያቁር ትእዛዝ ተላልፎለት ነበር። ከዚያ በኋላ ውጤቱ ምንድን ነበር? የየሰፈሩ ሰካራም በየጉድጓዱ እየገባ አለቀ። ይሁን እንጂ መንግሥት፤ ስንት ሰካራም አጥንቱን የከሰከሰበትን፤ ደሙን ያፈሰሰበትን ፕሮጄክት ድንገት ሰረዘ። በጊዜው የተወሰኑ ሰዎች ለዶማና ላካፋ መግዣ በሚል ወፍራም በጀት አስለቅቀው ከድህነት ተላቀቁ። አገሪቱ ግን የግዜር ገበጣ መጫወቻ መስላ ቀጠለች። የውኃ ማቆር ፕሮጀክሩ ቢቀጥል ኖሮ ዛሬ የሕዳሴውን ገደል ለመሙላት ግብጽን አንለማመጥም ነበር።

መንግሥት ደከመኝ ሰለቸኝ ሳይል የማይፈጽመውን እያቀደ፤ አዲስ አበቤም ደከመኝ ሰለቸኝ ሳይል በችግሩ እየቀለደ፤ ሃያ አምስት ዓመት ተገባደደ። በውቄም ስኮላርሺፕ በሚል ሰበብ፤ ማንነታቸው ያልታወቀ ፌዴራል ፖሊሶችየሚወረውሩት ቦምብ ወደማይደርስበት ቦታ ተሰደደ። በግንቦት ወር ወደ አገሩ ሲመለስ ችግር ይገጠመው ይሆን? ወይስ በእጃችን እንዳይጠፋብን ብለው ይተውት ይሆን? ቀጣዩን ክፍል በመጭው ግንቦት ይጠብቁ። ግን መንግሥትን መተቸት ሕገ መንግሥታዊ መብቴ መሆኑ ይሰመርበት። በርግጥ ሕገ መንግሥቱ እንደ አዲስ አበባ ምግብ ቤቶች ሜኑ ነው። የተጻፈውን በተግባር ስትፈልገው አታገኘውም።

በነገራችን ላይ ጠቅላይ ሚኒስትር ኃይለማርያም ደሳለኝ የሆነ መጽሔት ላይ ‹‹ያመቱ ሰው›› ተብለው መሸለማቸውን ሰምቼ ተደስቻለሁ፤ ሲያንሳቸው ነው። ይኼን ያክል እየተተረበ፤ ይኼን ያክል እየተሰደበ፤ ይኼን ያክል ከታችም ከላይም ንቀት እየተከናነበ ቆሞ መሄድ የቻለ ሰው፤ ሽልማት አነሰው? እኔም እንሆ፤ ሰሜን አሜሪካ ጫፍ አርፌ በጀርባየ የካናዳን የጉም ግድግዳ ተደግፌከጢሜ ላይ የኮካ ኮላ ጤዛ፤ ከኪቦርዴ ላይ በረዶየን አራግፌ፤ ‹‹የኢትዮጵያ ሕዝብ ሆይ ተባብረህ ተነስተህ ላንዴና ለመጨረሻ ግዜ አምባገነኑን ሥርዓት ገርስስ›› እያልሁ ነጋሪት ስደልቅ፤ አዲስ አበቤም ‹‹ወይ ኦን ላይን ላይ ያለ ሰው!›› እያለ በኔ ላይ ሲስቅ፤ ጀምበር ‹‹ሎግ አውት›› አድርጋ ጥልቅ።

ባለፈው 53 የፖለቲካና የሃይማኖት ድርጅቶች መግለጫ አውጡ ሲባል ስቄ ልሞት። ያሁላ ፓርቲ ቢሮ አለው? ወይስ ህልሙን ባሮጌ ሳምሶናዊት ሸክፎ የሚዞረው ሁሉ ተቆጥሮ ነው? ግሩም ነው መቸም። ኢትዮጵያ በቀንድ ከብት አንደኛ ሆና ወተት ይርባታል፤ አምሳ ሦስት የፖለቲካ ፓርቲ ኖሯት ፖለቲካው ይቸግራታል፤ እንዲያው ምን ይሻላታል?

ድሮ የኔ ቢጤ ባይተዋር ሰው ሲጨንቀው ሰላም ፍለጋ ወደቤተክርስቲያን ነበር የሚሄደው።
አሁን በየቤተክርስቲያኑ ድብድብ ነው። እዚያ ዲሲ ቤተክርስቲያን ልትስሚ ከሄድሽ በነጠላሽ ላይ የጥይት መከላከያ መደረብ አለብሽ። እነ አባባ ቆባቸው በሮ እስኪሄድ ሲከታከቱ ታዝበሽ፤ ከተወረወረ መቋሚያ በመትረፍሽ አንድየን አመስግነሽ፤ ወደ ቤትሽ ትመለሻለሽ። ባገር ቤት፤ ቤተክርስትያን ውስጥ አንድ ቄስ በዲያቆናት ሲታጀብ፤ የዲሲ ሐበሻ ቄሶች ግን በፖሊስ ታጅበው ነው የሚቀድሱ። እንዲያውም የፈረንጅ ፖሊሶች ለግልግል እየተጠሩ ቤተክርስቲያኑን ከማዘውተራቸው የተነሳ ቅዳሴውን ለምደው ተሰጥኦ ሁሉ መቀበል ጀምረዋል።

በነገራችን ላይ ላገራችን የገጠር ቄስ ክብር አለኝ። ዳዋ ጥሶ፤ ጤዛ ልሶ፤ ድንጋይ ተንተርሶ፤ ግርማ ሌሊትን፤ ጸብአ አጋንንትን ታግሶ፤ የሚኖር ነው። የዲሲ ቄስ በበኩሉ ሙዳየ ምጽዋት አፍሶ፤ አይስክሬሙን ልሶ፤ የንስሐ ልጁን ጡት ተንተርሶ፤ በቴስታ ተከሳክሶ ይኖራል የሚል ሐሜት አለ።
የዛሬውን የሕትመት ዳሰሳየን የምቋጨው በመሬት ‹‹ትንታኔ›› ነው። ያዲስ አበባ የመሬት ችግር የመነጨው ከዘጠና ሰባት በኋላ ይመስለኛል። ጌቶች በነዋሪው ተስፋ ስለቆረጡ፤ በሥልጣናቸውም ዋስትና ስላጡ፤ ‹‹ኪስህ ነው የቅርብ ወዳጅህ›› የሚለውን ዘፈን ማንጎራጎር መረጡ። ይህንን ዝንባሌ እኔና ቢጤዎቼ ‹‹የቀኝ አዝማች ሰውነቴ ሲንድረም›› ብለን እንጠራዋለን።

ቀኛማች ሰውነቴ ከደብረማርቆስ ባላባቶች አንዱ ነበሩ። እና በስድሳ ስድስቱ አብዮት ዋዜማ የጭሰኞቻቸውን መሬት ጆሮ ጆሮውን ብለው ካቲካላ ጠጡበት። ባላባት ጓደኞቻቸው ለምን እንዲያ እንደሚያረጉ ሲጠይቋቸው ‹‹መሬት ሳትበላኝ ልብላት ብየ ነው›› አሉ ይባላል። 

No comments:

Post a Comment