Thursday, March 3, 2016

ማንን እንማ የቂሊንጦ ወህኒ ቤት አስተዳደርን... ምንጭ – አዲስ አድማስ


አቶ አስራት ጣሴ ለአንድ ሳምንት ያህል ቆይታ ያደረጉበትን ቂሊንጦ ወህኒ ቤት በማስመልከት ከአዲስ አድማስ ጋዜጠኛ ጋር ቃለ ምልልስ አድርገው ነበር፡፡በወህኒ ቤቱ አስራት ስለተመለከቷቸው ችግሮች በስፋት በመዘርዘር ለጋዜጣው መናገራቸው የቂሊንጦ አስተዳደርን አስከፍቷል፡፡
አስተዳደሩ ለአዲስ አድማስ በጻፈው ማስተባበያ ቂሊንጦ ወህኒ ቤት በአስራት አሉ የተባሉት ችግሮች ውሸት መሆናቸውን በመዘርዘር ‹‹አስራት ለጥቂት ቀናት ቆይታ በማድረግ ስለ ቂሊንጦ መናገራቸው ስህተት ነው ››ብሏል፡፡አንድ የገረመኝን ነገር ላስቀድም በዚህ አገር ለሚሰነዘርባቸው ተቃውሞ ምላሽ በመስጠት ረገድ የወህኒ ቤቶችን አስተዳደርና ዩኒቨርስቲዎችን የሚስተካከል እየጠፋ ነው፡፡ሌላው የሚሰነዘርበትን ወቀሳ ውጦ ዝም ሲል እነዚህ ግን ወቀሳው ገንቢ ነው እናሻሽላለን ለማለት ባይደፍሩም ‹‹ውሸት ነው››ከማለት ግን አይቦዝኑም፡፡
አስራት በአንድ አነስተኛ ቤት ውስጥ ብዛት ያላቸው እስረኞች እንደሚታጎሩ ፣ሽንት ቤት ማግኘት ፈተና መሆኑን ሻወር መውሰድ እንደማይታሰብ ፣ንባብ ቅንጦት እንደሆነ ገልጸው ነበር፡፡የቂሊንጦ አስተዳደር በበኩሉ አስራት ስላነሷቸው ችግሮች ሳይጠቅሱ ንባብ አልከለከልንም በሚለው ላይ ለማተኮር በመሞከር ‹‹ወሲብ ቀስቃሽ የሆኑና ህገ መንግስታዊ ስርዓቱን የሚጻረሩ ይዘት ያላቸው መጽሔቶች፣መጽሐፉችና ጋዜጦች እንዳይገቡ ይደረጋል፡፡›› ብሏል፡፡
የትኞቹ መጽሔቶች ናቸው ወሲብ ቀስቃሽ የሆኑት ? የትኞቹ ጋዜጦች ወይም መጽሔቶች ናቸው ህገ መንግስታዊ ስርዓቱን የሚጻረር ይዘት ያላቸው ?ጋዜጦቹ እንዲህ አይነት ይዘት እንዳላቸው የሚለያቸውስ ማንነው? መቼም ህገ መንግስታዊው ስርዓት የሚሰኘው ገዢው ፓርቲ የመሰረተው መንግስት ነው፡፡ይህንን መንግስት በመተቸት ብዙ ሰዎች በጋዜጦችና መጽሄቶች ይጽፋሉ፣ሀሳባቸውን ይገልጻሉ፡፡ይህንን የቂሊንጦ አስተዳደር ‹‹ስርዓቱን የሚጻረሩ ››በማለት ላለመፈረጁ ምን ማረጋገጫ ይኖራል?በዚህ መነሻነትም ይመስለኛል ቅቡልነት ያላቸው ተነባቢነት ያገኙ መጽሔቶች ወህኒ ቤት እንዳይገቡ እገዳ የተጣለባቸው፡፡መንግስትም ጋዜጠኞቹን እንጂ ጋዜጣቸውን ወህኒ ቤት የማያስገባውም በዚህ ፍረጃ ነው፡፡
ምንጭ – አዲስ አድማስ

No comments:

Post a Comment